लोकसभा निवडणुक 2024 वेळापत्रक जाहीर
महाराष्ट्रात पाच टप्प्यात मतदान, ४ जून रोजी निकाल
नवी दिल्ली (वृत्त संस्था) : देशभरात 19 एप्रिल ते 1 जून दरम्यान लोकसभेच्या निवडणुका पार पडतील. 4 जूनला मतमोजणी होईल. महाराष्ट्रात पहिल्या पाच टप्प्यात मतदानाची प्रक्रिया पार पडेल. दरम्यान, देशभरात आज पासून आचार संहिता लागू झाली आहे.
केंद्रीय निवडणूक आयोगाने लोकसभा निवडणुकांचं वेळापत्रक आज, जाहीर केलं आहे. मुख्य निवडणूक आयुक्त राजीव कुमार आणि निवडणूक आयुक्तांनी हे वेळापत्रक जाहीर केलं.
लोकसभेच्या निवडणुका सात टप्प्यांत पार पडतील. पहिला टप्प्यातलं मतदान 19 एप्रिलला, दुसऱ्या टप्प्यातलं मतदान 26 एप्रिलला पार पडेल. तिसऱ्या टप्प्यातलं मतदान 7 मे रोजी, चौथ्या टप्प्यातील मतदान 13 मे रोजी पार पडेल. पाचव्या टप्प्यातील मतदान 20 मे रोजी, सहाव्या टप्प्यातील मतदान 25 मे रोजी पार पडेल. तर सातव्या टप्प्यातील मतदान 1 जूनला पार पडेल.
महाराष्ट्रात पहिल्या पाच टप्प्यात मतदानाची प्रक्रिया पार पडेल. म्हणजेच महाराष्ट्रात 19 एप्रिल, 26 एप्रिल, 7 मे, 13 मे आणि 20 मे रोजी मतदानाची प्रक्रिया पार पडेल.
महाराष्ट्रातील निवडणुकांचे टप्पे, मतदानाची तारीख व जिल्हे असे, पहिला टप्पा (५ मतदारसंघ) 19 एप्रिल 2024 – गडचिरोली, भंडारा-गोंदिया, नागपूर, चंद्रपूर, रामटेक. दुसरा टप्पा (८ मतदारसंघ) 26 एप्रिल 2024 – बुलढाणा, अकोला, अमरावती, वर्धा, यवतमाळ-वाशिम, हिंगोली, नांदेड, परभणी. तिसरा टप्पा (११ मतदारसंघ) 7 मे 2024 – रायगड, बारामती, उस्मानाबाद, सोलापूर, लातूर, माढा, सांगली, सातारा, रत्नागिरी सिंधुदुर्ग, कोल्हापूर, हातकणंगले. चौथा टप्पा (११ मतदारसंघ) 13 मे 2024 – अहमदनगर, शिर्डी, बीड, नंदुरबार, जळगाव, रावेर, जालना, छ. संभाजीनगर, मावळ, पुणे, शिरुर. पाचवा टप्पा (१३ मतदारसंघ) 20 मे 2024 – धुळे, दिंडोरी, नाशिक, पालघर, भिवंडी, कल्याण, ठाणे, मुंबई.
सिक्कीम, ओडिसा, अरुणाचल प्रदेश आणि आंध्र प्रदेशमध्ये या चार राज्यांत होणाऱ्या विधानसभेच्या निवडणुकांचं वेळापत्रकही निवडणूक आयोगाने जाहीर केलं.
