येवला मतदारसंघात 65.38 टक्के मतदान

अमेरिकेत वास्तव्यास असणाऱ्या पारेगाव (ता. येवला) येथील युवक प्रतीक महाजन याने अमेरिकेतून येऊन आपला मतदानाचा हक्क बजावला आहे. प्रतीक अमेरिकेतील शिकागो या राज्यात  वास्तव्यास असून तो तेथेच एका कन्स्ट्रक्शन कंपनीत नोकरी करीत आहे. वास्तव्य जरी परदेशात असले तरी भारतातील सर्व घडामोडीवर आपण लक्ष ठेवून असतो. त्यामुळेच मी खास मतदान करण्यासाठी, माझ्या देशाचा पंतप्रधान निवडण्यासाठी, देशाची धुरा योग्य व्यक्तीच्या हाती देण्यासाठी मी भारतात आलो आहे, असे प्रतीकने सांगितले.

अंदरसुल येथे रणरणत्या उन्हातही उत्स्फूर्त प्रतिसाद देत मतदारांनी आपल्या मतदानाचा हक्क बजावला. येथील  एकूण नऊ बुथ पैकी दुपारी चार वाजेच्या सुमारास बुथ क्रमांक १९० वर  मतदान यंत्रात बिघाड झाल्याने काही काळ गोंधळ उडाला मात्र अर्ध्या तासानंतर मतदान सुरळीत पार पडले. कुठलाही अनुचित प्रकार न घडता मतदान शांततेत पार पडले. नवोदित तरुण, वृद्ध महिला-पुरुष यांनी मतदान केंद्रावर सकाळपासूनच गर्दी केल्याचे दिसून आले. एकूण १००२० मतदारांपैकी ३७३१ पुरुष मतदार व  २६८७ स्त्री मतदार अशा एकूण ६४१८ मतदारांनी मतदानाचा हक्क बजावल्याने सरासरी ६४.०५ टक्के मतदान झाले.

नगरसुल येथे 59.60%, चिचोंडी बुद्रुक येथे 67.94%, मानोरी बुद्रुक येथे 63.37%, गुजरखेडे येथे ७१ टक्के, निमगाव मढ येथे 61.71%, आडसुरेगाव येथे 59%, गोरख नगर येथे 79.76%, चिचोंडी खुर्द येथे 63.95% मतदान झाल्याची माहिती आहे.