प्रगतशील शेतकऱ्यांचा पुरस्कार देऊन सन्मान; पुरस्कार देणार शेतकऱ्यांना प्रेरणा व ऊर्जा : पालकमंत्री दादाजी भुसे
नाशिक कृषी व नवतेजस्विनी महोत्सवाचे पालकमंत्री दादाजी भुसे यांच्या हस्ते उदघाटन संपन्न
नाशिक (प्रतिनिधी) : ज्या शेतक-यांनी उत्तमशेती करून समाजापुढे आदर्श ठेवला, अशा शेतकऱ्यांचा कृषि व संलग्न क्षेत्रात उत्कृष्ठ कामाकरीता आत्मा अंतर्गत “आदर्श शेतकरी पुरस्कार २०२४’ प्रदान करतांना आनंद होत असून या पुरस्काराच्या माध्यमातून जिल्ह्यातील अनेक शेतकऱ्यांमध्ये त्यांनी केलेल्या उत्कृष्ट कामाची ओळख होवून प्रेरणा निर्माण होईल, असे प्रतिपादन राज्याचे सार्वजनिक बांधकाम (सार्वजनिक उपक्रम) मंत्री तथा जिल्ह्याचे पालकमंत्री दादाजी भुसे यांनी केले.
गंगापूररोड वरील डोंगरे वसतिगृह मैदान येथे जिल्हा प्रशासन, जिल्हा परिषद, कृषी विभाग, आत्मा आणि महिला आर्थिक विकास महामंडळ यांच्यातर्फे नाशिक कृषी व नव तेजस्विनी महामहोत्सव २०२४ चे १० ते १४ फेब्रुवारी दरम्यान आयोजन करण्यात आले असून सदर महोत्सवाचे उद्घाटन राज्याचे सार्वजनिक बांधकाम मंत्री (सार्वजनिक उपक्रम) तथा पालकमंत्री दादाजी भुसे यांनी केले. यावेळी प्रकल्प संचालक (आत्मा) राजेंद्र निकम, जिल्हा अधीक्षक कृषी अधिकारी विवेक सोनवणे, महिला व बाल विकास विभागाचे उपायुक्त चंद्रशेखर पगारे, कृषी विकास अधिकारी कैलास शिरसाठ, जिल्हा समन्वय अधिकारी संजय गायकवाड आदी अधिकारी व मान्यवर उपस्थित होते.
पालकमंत्री दादाजी भुसे पुढे म्हणाले की, शेतकऱ्यांच्या सर्वांगीण विकासासाठी प्रधानमंत्री सम्मान निधी योजना ही केंद्र शासनाच्या माध्यमातून चालवली जात असून केंद्र शासनाद्वारे ६ हजार व महाराष्ट्र शासनाद्वारे ‘नमो शेतकरी योजना’ राबविण्यात येत असून या योजनेअंतर्गत सुद्धा वार्षिक ६ हजार रुपये शेतकऱ्यांना दिले जाणार आहे. केंद्र व राज्य शासनाद्वारे एकूण १२ हजार रुपये शेतकऱ्यांना दिले जाणार आहेत. तसेच एक रुपयात पीक विमा देणारे देशात महाराष्ट्र एकमेव राज्य असल्याचे श्री.भुसे यांनी सांगितले.
इगतपुरी येथे १० कोटी रुपयाचे कृषी भवन मंजूर
शेतकऱ्यांच्या सोईसाठी नुकतेच इगतपुरी येथे १० कोटी रुपयांचे कृषी भवन मंजूर झाले आहेत. तसेच मालेगाव येथे पाच कृषी महाविद्यालये मंजूर असून त्याचेही काम प्रगतीपथावर आहे. या कृषी महाविद्यालयाच्या माध्यमातून जिल्ह्याच्या शेतकऱ्यांना मार्गदर्शन केले जाणार असून त्याचे चांगले परिणाम येत्या काळात दिसून येतील, असा आशावादही श्री. भुसे यांनी व्यक्त केला.
यंदा पाऊस कमी झाला असल्याने पाण्याची टंचाई निर्माण होणार आहे. त्यामुळे जिल्ह्यातील पेयजलाचे व शेतीच्या पाण्याचे नियोजनाची कार्यवाही सुरु असून प्रत्येकाला पुरेसे पाणी मिळावे यासाठी सूक्ष्म नियोजन केले जाईल.
कांदा व द्राक्ष उत्पादक शेतकऱ्यांच्या भावना पोहचविणार
कांदा व द्राक्ष उत्पादक शेतकऱ्यांच्या निर्याती विषयक काही अडचणी आहेत. या सर्व अडचणी राज्यपातळीवर पोहचवून केंद्रापर्यंत पोहचविण्याचे काम शासन हाती घेणार असून यामाध्यमातून सकारात्मक मार्ग काढण्यात येईल, असा विश्वास पालकमंत्री श्री. भुसे यांनी शेतकऱ्यांना दिला.
कार्यक्रम प्रसंगी पालकमंत्री श्री. भुसे यांनी महोत्सवाचे उद्घाटन करून प्रदर्शनाची पाहणी केली. तसेच यावेळी मातीपूजन देखील करण्यात आले. कार्यक्रमाचे प्रास्ताविक प्रकल्प संचालक (आत्मा) राजेंद्र निकम यांनी केले.
पालकमंत्री श्री. भुसे यांच्या हस्ते प्रगतशील शेतकऱ्यांचा पुरस्कार देऊन सन्मान करण्यात आला. कार्यक्रमात पुरस्कार प्राप्त शेतकऱ्यांनी यावेळी आपले मनोगत व्यक्त करून उपस्थित शेतकऱ्यांना मार्गदर्शन केले.
