प्रो. डॉ. जिभाऊ मोरे यांच्या ग्रंथास महाराष्ट्र शासनाच्या हिंदी अकादमीचा पुरस्कार 

येवला (प्रतिनिधी) : येथील रहिवासी आणि के. जे. सोमैया  महाविद्यालयातील हिंदी विभागाचे वरिष्ठ प्राध्यापक डॉ. जिभाऊ मोरे यांनी मराठी भाषेतून हिंदी भाषेत अनुवादित केलेल्या ‘महात्मा बसवेश्वर और बोधिसत्व बाबासाहेब डॉ. आंबेडकर’ या ग्रंथास महाराष्ट्र शासनाच्या हिंदी साहित्य अकादमीचा ‘मामा वरेरकर’ हा प्रतिष्ठेचा पुरस्कार नुकताच मुंबई येथे झालेल्या कार्यक्रमात हिंदी अकादमीचे कार्याध्यक्ष डॉ. शीतलाप्रसाद दुबे, उपाध्यक्ष मंजू लोढा व वरिष्ठ हिंदी साहित्यिक डॉ. सुधाकर मिश्रा तसेच इतर मान्यवरांच्या उपस्थितीत सन्मानपूर्वक प्रदान करण्यात आला. रोख रुपये ११०००/-, सन्मानचिन्ह व प्रमाणपत्र असे या पुरस्काराचे स्वरूप आहे.

गेल्या अनेक वर्षापासुन प्रो.मोरे अनुवादित ग्रंथांचे लेखन करीत आहेत.आता पर्यंत त्यांचे ५ अनुवादित ग्रंथांचे प्रकाशन झालेले आहे. या शिवाय मार्कंडेय का कथा साहित्य और ग्रामीण सरोकार, हिंदी साहित्य में दलित चेतना, व्यावहारिक हिंदी इत्यादी त्यांचे मौलिक ग्रंथ आहेत. तसेच त्यांचे ३५ शोधनिबंध देखील प्रकाशित असून, ते सावित्रीबाई फुले पुणे विद्यापीठाच्या हिंदी अभ्यास मंडळ व विद्या परिषदेचे माजी सदस्य आहेत. यापूर्वी प्रो. मोरे यांना भारतीय दलित साहित्य अकादमीचा डॉ. बाबासाहेब आंबेडकर फेलोशिप सन्मान, युगधारा फाउंडेशन लखनौचा युगधारा साहित्य गौरव सन्मान, राष्ट्रगुरु रविदासजी सेवा संघ नाशिकचा साहित्यरत्न आदी पुरस्कार लाभले आहेत.

प्रो. मोरे मागील ३१ वर्षांपासून  के. जे. सोमैया महाविद्यालयात हिंदी विषयाचे प्राध्यापक असून त्यांच्या मार्गदर्शनाखाली तीन विद्यार्थ्यांनी पीएच.डी. व दोन विद्यार्थ्यांनी एम. फिल. चे संशोधन पूर्ण केले असून, सध्या सात विद्यार्थी पीएचडीसाठी संशोधन करीत आहेत. डॉ. मोरे सध्या यशवंतराव चव्हाण महाराष्ट्र मुक्त विद्यापीठाच्या पदव्युत्तर हिंदी अभ्यासक्रम निर्मिती समितीवर कार्यरत आहेत. तसेच त्यांनी याच विद्यापीठाच्या सामाजिक शास्त्र विषयाच्या ३ मराठी पाठ्यपुस्तकांचे हिंदीतून अनुवाद केले आहेत. तसेच काही पाठ्यपुस्तकांचे लेखन व संपादन देखील केले आहे. प्रो. मोरे यांच्या जळगाव आकाशवाणीवरून हिंदीतून अनेक साहित्यिक वार्ता देखील प्रसारित झालेल्या आहेत. सध्या ते सोमैया महाविद्यालयाच्या हिंदी संशोधन केंद्राचे समन्वयक म्हणून कार्य करीत असून या संशोधन केंद्रात महाराष्ट्रातील ३० विद्यार्थी पीएच.डी. पदवीसाठी संशोधन करीत आहेत. महाविद्यालयाच्या गोदातरंग वार्षिक अंकाचे गेल्या अनेक वर्षांपासून प्रो. मोरे संपादक आहेत.

प्रो. मोरे यांच्या या यशाबद्दल येवल्यातील ज्येष्ठ साहित्यिक प्रा. गो. तु. पाटील, डॉ. भरत कुमार सिन्हा, प्राचार्य डॉ. भाऊसाहेब गमे, राष्ट्रसेवा दलाचे राज्य अध्यक्ष प्रा. अर्जुन कोकाटे, प्रा. रवींद्र ठाकरे, महाराष्ट्र राज्य वखार महामंडळाचे मा. प्रवीण कुमार देवरे (भा. प्र. से.), दिग्दर्शक प्रवीण काळोखे, महाराष्ट्र राज्य परिवहन महामंडळ सहसचिव मा. राजेंद्र होळकर, नाट्य लेखक दत्ता पाटील, चित्रकर्मी देवेन कापडणीस, श्री. अरुण थोरात,शाहीर शरद शेजवळ, पत्रकार योगेंद्र वाघ, गोकुळ वाघ,डॉ. सुदाम पातळे, डॉ. अजय विभांडिक, श्री. दत्ता उटवाळे, प्रा. कैलास चौधरी, प्रा. विसपुते, प्रा. संजीव कदम आदींनी  अभिनंदन केले आहे.