मतदानाचे प्रमाण वाढीसाठी शिक्षकांनी जनजागृती करावी : तहसीलदार महाजन  

येवला (प्रतिनिधी) : जनमानसात मतदान प्रक्रियाविषयी जागरूकतेत वाढ होणे गरजेचे आहे.शिक्षकाचे समाजात आदराचे स्थान असल्याने शिक्षकांनी पुढाकार घेऊन मतदान प्रक्रियेचे ज्ञान प्रत्येक मतदारापर्यंत पोहोचवावे, मतदान प्रक्रियेत सामान्य मतदाराचा सहभाग वाढविण्यासाठी जनजागृती करून मतदानाचे प्रमाण वाढविण्यात योगदान द्यावे असे प्रतिपादन तहसीलदार आबा महाजन यांनी केले.

लोकसभा निवडणूकीच्या जनजागृती अभियान अंतर्गत येथील स्वामी मुक्तानंद विद्यालयात तहसीलदार आबा महाजन व गटशिक्षणाधिकारी संजय कुसाळकर यांच्या प्रमुख उपस्थितीत प्राथमिक व माध्यमिक शाळेतील मुख्याध्यापकांची सहविचार सभा संपन्न झाली.या सभेमध्ये प्रत्येक शाळेने मतदार जागृती संदर्भात नियोजन करण्याबाबत माहिती देण्यात आली.विस्तारअधिकारी सुनील मारवाडी,सर्व केंद्रप्रमुख मुख्याध्यापक संघाचे अध्यक्ष दीपक गायकवाड,अर्जुन घोडेराव, गोरख कुळधर आदी उपस्थित होते.

शिक्षकांनी जनजागृती केल्यास साजरी ग्रामस्थ चांगला विश्वास ठेवतात त्यामुळे राष्ट्रीय कर्तव्य समजून शिक्षकांनी लोकांमध्ये मतदान वाढविण्यासाठी जनजागृती करावी व त्यांना प्रोत्साहित करावे अशा सूचना तहसीलदार महाजन यांनी दिल्या.

गटशिक्षणाधिकारी कुसाळकर यांनी मतदानाची जागृती करण्यासाठी शाळा विद्यालय व महाविद्यालय स्तरावर प्रभात फेरी काढून जनजागृती करण्याच्या सूचना दिल्या. मतदाना संदर्भात पत्रलेखन,रांगोळी स्पर्धा,वक्तृत्व स्पर्धा,पोस्टर्स स्पर्धा आणि चित्रकला स्पर्धांचे आयोजन करण्याच्या सूचना उपस्थित मुख्याध्यापकांना दिल्या. समाजातील जेष्ठ, महिला आणि दिव्यांग मतदारांना जास्तीत जास्त या प्रक्रियेमध्ये सामावून घेण्यासाठी विविध उपक्रमांचे आयोजन करावे असेही त्यांनी सांगितले.प्रत्येक शाळेने नियोजन करून त्यानुसार सर्व कार्यक्रमाची प्रभावीपणे अंमलबजावणी करण्यात यावी असेही कुसाळकर यांनी शिक्षकांना सांगितले.

सदर विचारसभेला तालुक्यातील प्राथमिक व माध्यमिक शाळांचे मुख्याध्यापक व पदाधिकारी उपस्थित होते.